ده الحقيقة أول موضوع ليا على المدونة هنا يا جماعة وقلت أبدأ بحاجة خفيفة.....أبدأ منين؟؟؟؟
أنا نفسي مش عارف لكن هقول انه لفت نظري حكاية ممنوع الاقتراب والتصوير من الأراضي العسكرية أو التابعة للجيش.....أبسطهالكم
امبارح كنت بلعب كورة والكورة مرة واحدة واحد غشيم شاطها وداها بعيـــــــــــــــــــــــــــــــــــــــــــــــــــــــــــــــــــــــــــــــــــــد..بعيد فين بقى؟؟؟
أرض تابعة للجيش..المهم واحد صاحبنا ربنا يهديه تطوع وقال انه هايطلع وهاينط جوة المكان برغم السور العالي جدا وهايجيب الكورة...اه بقى ماهي بلطجة
المهم أخينا اللي فارد عضلاته ده لما طلع فوق السور الظاهر انه جاب ورا وماقدرش ينط جوة وراح مشاور لناس جوة ونده بصوت عالي :كابتن كابتن..الكورة بتاعتنا وقعت هنا.....أوبس
الراجل قاله:انتا اتجننت انزل من عندك بسرعة قبل ماحد يشوفك وتودي نفسك في داهية...انزل
قاله : لأ مانا مش نازل بس معلش هاتعبك معايا دورلنا عليها....كل ده من فوق السور
الراجل قاله ماشي بس استنى اما الظابط يمشي.....مش عاوز أشتم هنا بقى.....يعني برة من الآخر ممنوع الإقتراب وجوة قمة التسيب
ده طبعا غير اللي العساكر بيعملوه جوة...وقال جيش ونظام قال
ازاي واحد يبقى قاعد فوق سور بتاع أراضي عسكرية محظورة فترة تزيد عن النص ساعة وماحدش يكلمه...وفوق كل ده يجيي بتاع خمس عساكر سايبين شغلهم وبيدوروا على كورة.....كورة....معايا انتوا
وازاي أصلا أرض مهمة زي دي تبقى جنب الناس كده معرضة لأي دخيل ومن غير رقابة....أكرر من غير أدنى مستوى رقابة
يعني البلد ناقصة تسيب...أما هي بايظة من جوة ومن الأساس,,عاوزينها تنضف من برة ازاي بس
حسبي الله ونعم الوكيل...ده طبعا حاجة هايفة جدا ولا تكاد تذكر بالنسبة للي بيحصل في البلد اليومين دول وكل يوم بس الحقيقة الحكاية دي استفزتني أوي كمواطن خايف على أمن بلده وشايف العساكر وحراس الأمن سايبين شغلهم وداخين ورا كورة
شكرا!!!ولسة
6 وانت رائك ايه؟:
قال المتنبي منذ زمن بعيد
و كم ذا بمصر من مضحكات و لكنه ضحك كالبكاء
وهو مين اساسا هيتجسس علينا اللي بيدولنا السلاح؟؟
طب المهم .. لقيتوا الكورة و لا لأ ؟
: )
عوضنا على الله في الكورة طبعا لأن تلاقي العساكر طمعوا فيها بقى عشان كانت أديداس كده وشكلها جامد......يللا بقى بجملة التسيب الللي جوة.....وتلاقيهم ادوا الظابط المشرف عليهم قرشين عشان يسيبهم يلعبوا براحتهم ومايبلغش القيادة.....ونسيت أقوللكم بقى ان كل التهريج ده حصل ي مقر القيادة المركزية للجيش...وبجد والله مش تهريج.....وبعدين احنا من امتى عندنا أصلا أسلحة تنفع ان حد يتجسس عليها....يا جدعان احنا مش محتاجين أصلا حد يتجسس علينا لأننا طوب الأرض عارف ان احنا بلد الأمن والأمان
طيب الكوره حصلها ايه
ولا العساكر لعبوا بيها معاكوا
التسيب في كل شبر في مصر
ابتسم انت في مصر المنهوبه
عجبني الموضوع قوي ....
بجد ده اللي بيحصل فعلا
انا مش هاقول حاميها حراميها لانه مينفعش في الموقف ده
بس فعلا العساكر دي مبتفهمش اي حاجة في اي حاجة ...
يا انما بقي هم ناس زينا كدة عارفين انه مفيش فايدة في اي حاجة فساعدوكم انكم تلاقوا الكورة
عارف
فكرتني بحاجة لطيفة قوي ...
كان مرة فيه واحد في قسم بوليس بيشرب بانجو
مقبوض عليه يعني
و الراجل مدمن و عاوز يشرب ..فالعسكري قاله
هات عشرة جنيه و انا اسيبك تشربها بعد ما البيه يروح ...
بلدنا امانة في ايدينا
خللي بالك ..بلدهم هم
إرسال تعليق